Mezzu chilu di poesii 

Vinnu poesii;
l’haiu d’àrrìdiri, di chiànciri,
d’amuri, d’òdiu, di sdegnu, d’affettu,
li scrivu cu lu cori, cu tantu rispettu. 

Accattativilli ‘na mezza chilata,
l’haiu pi comu vatri li vuliti,
haiu puru chidda mutivata,
pi cantalla a la rifriscata. 

Li poesii, si spizzùlìanu
comu lu panuzzu friscu,
cu lu sciavuru di la farinedda,
cci duni li primi muzzicunèdda. 

Tutti nun vennu li stessi,
cu su abbrusciateddi, cu crudi,
cu mali cotti, cu beddi durati,
cu d’oru culatu, diciottu carati.  

La poesia è comu ‘na rosa,
sfògliala di li petali e leggila,  
cc’è tantu di sapiri,
tantu di capiri. 

Tu ca sì allittratu,
accàttati mezzu chilu di poesii,
pòrtali di casa ‘ncasa , a li to parenti,
spàrtili a li to figli, falli cuntenti. 

Dùnali a li to amici, a li to nipùti,
a la genti disidirusa di lèggiri, di sapìri;
nun vogliu sordi, nne dopu, nne ora,
mi basta ‘na penna, pi scrìviri ancòra. 

2012 Giuseppe Cardella