Prighiera

Addinucchiatu ‘nterra
a li pedi di ‘sta cruci,
pregu a tia Cristu
pi darimi un segnu di paci.

Ti pregu cu amuri,
dammi fidi comu a l’atri,
pi cridiri a tia, Signuri,
e l’Onniputenti Patri.  

‘Nchiuvatu,
cu la curuna di spini ‘n’testa
n’sanguliatu, fragellatu,
ti ficiru la festa.

Oh! Cristu, nuddu
di tia appi pietà;
t’ammazzaru
nun canuscennu la virità.

La Matruzza
a lì tò pedi chianciva,
cu li lacrimi
li chiaghi ti vagnava.

Dispirata a mani giunti
gridava: nun muriri!
Sarva ‘stu munnu,
nun t’inni iri!

La luci di lu suli ‘ntra jornu,
tuttu ‘nsemmula s’astutà,
lu celu si vistì di niuru,
tuttu lu munnu trimà

Lu poviru Crucifissu
sfinutu, senza sciatu,
isà l’occhi ’ncelu
e lu Patri ha ‘mpluratu.  

Lampi, trona,
acqua e ventu;
l’occhi chiudisti;
pi tutti fù un turmentu.

Mortu ti scinneru di la Cruci
c’un linzolu e dù scali a lu latu
‘mbrazza ti piglià la povera Matri
stringennuti a lu cori scunsulatu.

Sistimatu ‘nta lu sipolcru
l’Addulurata Matri la facci ti vasà,
facennusi la cruci dissi:
sia fatta la tua volontà.

Dopo tri jorna a Gerusalemmi
ci fù un gran scumpigliu
gridavanu tutti:
abbriviscì lu figliu!

“Gesù mortu ammazzatu
è risuscitatu”
Ora sedi a la destra
di lu Patri tantu amatu.  

Ti ringraziu Cristu ca mi pinzasti
la fidi ca nun avia tu mi dasti                   
         2007 Giuseppe Cardella