Premio Letterario "Lu papanzicu" - 2010
Poesia "Du coccia di grannuli" - 2° Premio 
Poesia "Aspittannu l'atobussi " 4° Classificato

 

bothome.jpg (4069 byte)

 

 

Du còccia di grannuli

Dintra un calici
di vitru russo,
du còccia di grannuli
spartuti l’uno di l’atru
aspettanu d’addivintari
‘na sula unica gùccia.

Gùccia ca dissita
l’arsura, la smània,
l’ardiri, l’amuri. 

Gùccia d’amuri
spartuta di tanti gùcci,
aspetta ‘nsilenziu
la forza di ‘n’onda
pi purtalla
all’atra sponda.

Unica e sula, è china d’amuri,
pari nica,
ma è cchiù granni di lu mari.

             2009 Giuseppe Cardella


Aspitannu l’atobussi

 Staiu partennu,
tri figli comu l’oru
staiu lassannu.

Mi salutaru ‘mmezzu la strata,
davanti lu purtuni,
cu li manuzzi isati,
chini di scantu,
cu l’occhi vagnati
di chiantu.

 Mè muglieri si li stringiva
stritti-stritti a lu sò pettu,
cu lu cori tristi e a luttu.

Pi l’èstiru staiu partennu,
‘ncerca di travagliu,
pi sfamari ‘sti ‘nnuccenti,
pi falli crisciri e studiari,
pi daricci ‘n’avviniri,
di la giusta via caminari.

La mugliredda mia
staiu lassannu,
a stari senza idda quarchi annu.

Chi famiglia sdisulata è la mè.
Aiutami Signuri ! Aiutami !
Iu pregu la Madonna e a tia vidè.
Fammi gòdiri ‘sta famiglia
nun mi mannari luntanu,
guidami, tenimi pi ‘mmanu. 

 

L’atobussi arrivà !
Pensacci tu
matruzza mia !

Camina, accelera, sparisci,
perditi ntà ‘sta  via,
‘mmezzu ‘sta fudda.
Nun partu, nun mi  nni vaiu,
a costu di manciari
pani e cipudda.

L’atobussi lenta passà.
Si nnì ì, nun la firmavu,
a la mè casuzza riturnavu.

A lu stessu mè paisi
truvavu travagliu.
A li novi misi nascì mè figliu,
lu chiamavu “Furtunatu”,
ora è granni, laureatu,
avi famiglia ed’è sistimatu.

‘N’amàmu tutti e semu filici,
pregu e ringraziu lu Signuri
di ‘sta grazia chi mi fici.

2010 Giuseppe Cardella